ان جيت عندي مرحبا بك وحياك=تشيلك عيون الرفيق وتصونك
وان رحت عني ياعسى الرب يرعاك=غالي وانا مانيب ميت بدونك
ماني بهضم حقوق مثلك وشرواك=ولاني ملحّقك الحصى في متونك
أحفظ مقامك وأتنومس بطرياك=وأسد كل اللي بقى من ديونك
حتى لو ان إبليس ذا المره اغواك=وطغت على فعولك فعايل جنونك
ابقى احترم وضعك واعدد مزاياك=وتبقى مواثيق الوفا ماتخونك
يكفيني انك خذت رايك بيمناك =ماصرت مثل اللي مشوا يتبعونك
الفرق واضح بينك وبين ذولاك=اللي لو اجمعهم سوى مايجونك
طاحوا من عيوني عساهم فداياك=مثل ماحوّل قدرهم من عيونك
اللي يسولف لك لزوم يتقفاك=واللي يبون رضاك لايزعلونك
ياطيبهم قدام وجهك وعيناك=ومن يوم تِقفي فالخفا يلحقونك
ان غبت ماقالوا علامك وش ابطاك=ولاجيت قدم عيونهم يذكرونك
خذها نصيحه واحفظ العلم لاجاك=اقطع مواصلهم قبل يقطعونك
ولا انته بناسيني وانا مااقدر انساك=لو كان جهال العرب يحرجونك
بس الأكيد ان كانها عمست ارياك=عوّد وتلقاني شويرك وعونك
وسق راحلة وصلك وعقّل مطاياك=قدام ربعة بيت ربعٍ يبونك
والعلم لا وصلك ماهوب يتعداك=وانا على خبرك وحروة ظنونك
من أرشيفي المتواضع
العرض العادي
