مهوب من الترف عندي مير من زمااااااااااان ما دخلت المطبخ عشان أطبخ و أقرقع بالمواعين ..
دايم القى من يتسفيني في النقطه ذي بالذات و أن ما لقيت عسى ربي يخلي الدراهم اللي جابت الخدم و يسرت الحال ..
عاد الزمان ذا جاي أهلي هبالن إلا تطبخين يالوجد منت حرمه من عرض هالحرايم ..
قلت جعلن فداكم أنا أبشروبي في كل الميادين إلا البصل و الثوم كل شيء يهون عندي الا ريحة العيشه و شلون أبصبر عليها ..
(عاد تصدقوني حالياً أفكر أني أخترع إي شيء يعالج النقطه ذي ..والله لو يطلع إختراع يخلي ريحة الوحده تبنبن وهي في مطبخها وما تخلي جسمها يتأثر بريحة الأكل أنشهد أن صاحب هالإختراع بيتصدر أغنى أغنياء العالم في ظرف يومين )..
المهم مالكم بالطويله الالحاح من هنيا ..و من هنا أمي (جعل ربي يخليها لنا ) ما تعرف ترقعلي قدام الناس (تصدقون أنها مره في مجمع حريم و كلن يمدح بناته و أنا المشكله رازه خشتي قدامهم و مسويه كني حالمه و ناعمه و جاء الطاري بالطبخ ..قالت أما الوجد ما فيها مثلها في البلد (رفعت نفسي شوي أحسبنها بتمدحنى مع إني عارفه عوايدها مير ما في قلبي ) كملت وقالت أقصاها شاهي و لا زينته صاطته بالملعقه !!!..حياتها يا دوام يا (ترنت )...!!!
عاد هنيا حسيت أن الوضع حرج حبتين و قالت مهوب طيبن مني الا غصبن عليا أبطبخ كودها تزين نظرة الناس لي في الطبخ ..

أبشركم راح ثلاث إيام من رمضان والانتصارات حافله ..
و صرت يا مال فرقا العين من عقب ما أصد و لا أهتم بطاري الطبخ ..لا جاء الطاري فيها قلت (يختس الزيت أول و الا البصل أول )..!!!
و عانوني من الهياط بعلم البنيات المستجدات ..
على فكره ترا ما أزين الا الاكل اللي أحبه ..و بكيف العرب كلوا والا يحمدون ربهم ...

رز على الطريقه الهندية :-
كوبين و نص رز بسمتي ..
ثلاث أعواد دارسين ..
ثلاث حبات هيل ..
ثلاث حبات مسمار ..
ورق غار (بعد ثلاث حبات -ترا هي مهيب ثلاث بس عاد طبخي و بكيفي )
ملعقة كركم ..
فلفل حار ثلاث ..
ليمون اسود بس ثنيتين ..
مكعب ماجي ثنيتين بعد ..
سخني المويه و أسلقي هالأشياء مع بعض (نص إستواء )..
في هالوقت تكونين ..
مقطعه صدور دجاج و ناقعتها في كاس مويه مع صفار الزعفران ..
على الفرن حطي ..
بصل (ثنتين ) مع شوية زيت ..
و بعدين صفي الدجاج من المويه و أغسليه من الماء الاصفر شوي (موب عاد تجبين أقصاتس و يروح اللون )..
و حطيها على البصل ..حركي شوي ..
و بعدين ضيفي (ملعقة كاري -بهارات -قرفه -صلصة الصويا -ملح )..
حطي كوب ماء و خليها عشر دقايق على نارهاديه ..
في الوقت حمري بطاطس مقطع مكعبات و فلفل بارد و بصل أكثر منهم بشوي )...
ضيفي البطاطس والفلفل و نص البصل على قدر الدجاج و خليه يستوي على فهانيه شوي...
طلعي الرز و أشخليه من المويه ..
حطيه بدفعات على قدر الدجاج مع التحريك المستمر ..
غطي القدر ولا شفتيه زان حاله شوي سكري عليه و قدميه مع (الدقوس وحركاتنا يالبدو الشطه الزبادي اللبن ) لحبانتس ..
أن كان شفتوا فيني أمل علموني عشان أعلمكم بطبختن خطيرة..