مخاوي حمدآ لله على سلامتك !!

1 - 7 - 2009, 01:12 PM

سلامن عليكم مرتادي الناقول ..

مساكم الله بالخير بالتوقيت الدولي ..

اليوم صحيت وانا متعامس مالي نفس في الدوام .. دوامي كآن 6.30 .. ولا صحصحت إلا 8.40 تقريبآ ..

لبست وترستكت وطقيت الكآب وقززت العيون بالنظارات .. ودقيت سلف على الدوام ..

طبحت في الدائري الشرقي من عند خريص .. إلا أبو الدايري اللي واقف مدري وش فيه !!

يآولد وش السالفة الورعان معطلين ما هنا زحمة دايما وش اللي صار !! والله مدري وش اللي صار ..

كالعادة وقت الزحمة اطق على مركز عمليات المرور (993) اتطقس الوضع عندهم واخذ الطرق الفاضية والمؤدية لنفس الوجهه ..

وأنا مير ادق الا يطلع لي واحد اسمه بندر الحربي قال حادث على مخرج 10 بأتجاه الشمال قلت ما عليه يمديني اخذ الخدمة ولا انكاس ..

ويوم صكيت الا التلفون يلعلع مرتن أخرى

إلا هو مخاوي !!

وأرد عليه ..

//
بالأحمر مخاوي ..
بالأزرق أنا ..
***** <<< كلام لحظة غضب ..
\\

سلام

عليكم السلام

كيف الحال طيب

بخير الله يسلمك

تراني صدمت !!

وأنا يخمني بطني توني صاك من المرور يقول حادث واخبر الرجال دايم مواطي رجيله من حول ذاك المخرج وانا اللي ارتاع

هاه سلامات فيك شي !!

لا موتري ..

** ** الموتر اهم شي سالم متعافي ..

ايه

أجل الحمد لله على سلامتك وبالنسبة للموتر حديد في حديد اهم شي اللي صدمته ما فيه شي
(( انا في بالي ان اللي قالوه لي المرور هو حادث مخاوي))

ما صدمت أحد !!

وش صدمت أجل !!

صدمت الرصيف !!

رصيف !!

اثاري ابو الشباب مفهي وهو يسوق وجالسن يهوجس وما رده الا الرصيف يوم بنط فيه ..
وانا اللي مير تثور ثايرتي يوم شفت برود راعي الخجفات !!

***** تقول صادم وتاليتها في رصيف لابوك لابو من يرد عليك الصبح ***** يالله مع السلامة ..

وانا مير اسكر الخط وعضامي توجعني وبطني يخمني وركبي تجلس تصافق ما يردها إلا ديكور السيارة من الروعة ..

نعنبو شكله من زود معزته وغلاته احسبنه متعيد في المخرج وجايب الطعة وتاليتها حاذف على الرصيف وصادمه ..

وانا اللي احن عليه وارسل له كولمي ومير يدق علي واجلس اتحمد لله بالسلامة وأواسيه شوي واضحك معه الين وسعت خاطره وصكيت الخط ..

وابشركم الرجال متعافي ولا عليه خلاف حديد في رصيف بالطقاق اهم شي خوينا وأنامله الذهبية الله لا يقطعنا منها ان شاء الله

وأخيرآ ..

مخاوي الحمــد لله على السلامة ..

وأبشر بالعشاء في الوقت اللي تبيه ..

أدري انك مشغول الايام هذي بس متى ما حسيت انك فاضي طق علي بس وأزهل كلبوا شي

أهم شي طق علي قبل 15 من الشهر الميلادي <<< قبل حزة الطفرة

ودمتم

1 - 7 - 2009, 01:32 PM

الحمد لله على السلامه

لاسلمت الأرواح الحديد يتعوض

ماترى باس يامخاوي طهور انشاء الله وتخفيف ذنوب

وابشر بالي تبي والله اني صادق

واذا تبينا نقطلك ونصلح الموترانا و اعضاء المنتدى في خدمتك انت وشرواك

وانا أولهم وابشر بالي يسرك وانا اخوك

1 - 7 - 2009, 02:11 PM

مخاوي

الحمد لله ع السلامة

ماتشوف شر

السيارة تتعوض بس انت ماتتعوض

الحمد لله جت سليمة

المرة الجاية انتبه تطلع ع الرصيف

بمين كنت تفكر خخخخخخخخخخخخخخ

كريزي

الحين مو دعوة عشاء

الا تاخذ سيارته وتصلحهاا

1 - 7 - 2009, 02:54 PM

الحمد لله على السلامة

ماتشوف شر

1 - 7 - 2009, 03:05 PM

والله اني بعد خمني بطني وارتعيت

بس الحمد لله على سلامتك

1 - 7 - 2009, 03:17 PM

الحمدلله على السلامه يامخاوي ..
وماتشوف باس ..
اهم شي انك طيب وبخير الباقي امره بسيط ياعطيب الضرايب ماهوب هم ..
تخجف وانت فالدايري يامخاوي
الحمدلله ع سلامتك يابعد قلبي ..

1 - 7 - 2009, 05:02 PM

ما تشوف شر يامخاوي..

والحمد لله على سلامتك...

روعنا كريزي بس أشوا إستانسنا يوم عرفنا إنك طيب ومافيك إلا العافيه والحمد لله جات سليمه..

1 - 7 - 2009, 05:27 PM

الحمدالله على السلامه

ياعطيب الظرايب

والحق نزورك في محلك وتستاهل الواجب قل تم

1 - 7 - 2009, 05:50 PM

اقتباس:

المشاركة الأصلية كتبت بواسطة ابو حاتم عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

الحمدالله على السلامه

ياعطيب الظرايب

والحق نزورك في محلك وتستاهل الواجب قل تم

هههههههههههههه

ابو حاتم تبي تزوره عشان تحمدله بالسلامه

والا تبي تزوره عشان تعرف من هو

والا الاثنين سوا؟

1 - 7 - 2009, 06:21 PM

اقتباس:

المشاركة الأصلية كتبت بواسطة مناحي عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

هههههههههههههه

ابو حاتم تبي تزوره عشان تحمدله بالسلامه

والا تبي تزوره عشان تعرف من هو

والا الاثنين سوا؟

والله انك محقق ممتاز صحيح صاحب مهنه

المشكله اني اتحراك تجيب العلم ليه وطالت السيره
بس ذلحين ماعاد تفرق معي اعرفه اومعرفه اهم شي انه كويس وصار صديقي خلاص

ان قدرت تجيب العلم والله انها في كبدي تاكلني

هو منهو الله يرجه
هههههه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
لله غني ..!	مفرج المجفل	عطـــر الكلمـــات	41	20 - 2 - 2009 09:01 PM
شاهد صور الامطار على محافظة الخرمه جميل ونتظروا المزيد	العمدة	::: الصوت والصورة :::	4	4 - 11 - 2008 12:58 AM
الكلمة الطيبة دليل على طيب قائلها	روح الوفا	الشـريعة والحيـــاة	4	3 - 11 - 2008 10:03 PM
الرحمه أصدق مشاعرنا و أروعها // لله در التواضع و المحنيه	ريـ م ـه ,	الـذائـقــة الشعـريـة	1	9 - 7 - 2008 01:09 AM
شكر خاص للأخ مفرج الناقول :/:/: الحمد لله حصلت على عضو فعال	VIP	الضيافة والمناسبات	17	13 - 3 - 2008 01:05 AM