سلام عليكم كلكم وعوده حميده للطلاب والطالبات
طبعاً مشغولين هالإسبوع بالمدارس وقلقها

يوم السبت كان يوم البدايه .. وليست كأي بدايه
"بندر" الصغير متوجّه للصف الثاني .. لكن بمدرسه جديده غير مدرسته الأولى
يعني الأمور تتطلب موافقة المدرسه الجديده وقبولها وبعدين نقل الملفات وخلافه
كل هالأمور سهله مع "بندوري" .. لكن الصعوبه كانت مع بطل هالقصه ..


الشيخ/ سعد بن فالح الثاني <<<< ترى ماهوب من شيوخ قطر إنتبهوا

سعد جديد على المدرسه وشكل الرجال مانفعت معه التمهيدي والروضه
توقعت الأمور سهله معه مثل ماحصل مع بندر .. حب للدراسه لدرجة إنه لو خليناه يغيب سبب لنا إزاعاج.

طبعاً شكل سعد ماحب المدرسه الجديده وكان يبغى المدرسه القديمه اللي درس فيها بندر
على الرغم من إنا .. عطيناه مغريات عن المدرسه الجديده .. وقلنا له شوف عندهم ملعب زي ملعب "ياسر" (مزروع يعني) .. ومع المغريات ماتغير شي ..

المهم سعد ترك الطلاب والمدرسين وجاء لأبوه مع الآباء..
وقال أبوي:قال لبيه .. قال:أنا بأفصل .. قال:يابوك خل لين نسجلك أول شي وبعدين أفصل :p
قال:لا .. أنا بأفصل وبس .. قال أبوه:خلاص بكره نجي لو ما صلحت لك المدرسه أفصل
وإتفقوا على هالكلام .. كلمة رجال لرجال .. وفي اليوم الثاني يوم الأحد حضر الجميع
وكان يوم مفتوح ألعاب .. وإختاروا سعد للعبه الأولى مع 20 طلب مستجد
وكانت لعبة الحلقات قريبه من لعبة الكراسي .. وأبدع سعد .. فاز في اللعبه على طلاب كثير
حوالي 20 طالب .. وكان طعم الفوز مع اللعب كفيل بتغيير القرار الصعب
والرجال هون عن اللي في راسه .. وقرر يكمل وما يفصل
قلنا الحمد لله .. واليوم إتفق الجميع إنه يكون عندهم لوحده ويكون أبوه متواجد الساعه 9,30 حسب توجيهات المدرسه..
والحين أبوه بيطلع يجيبه .. ولو حصل تغيير في التوجه العام بأكون حاضر معكم على هالموضوع

وكل سنه وإنتم طيبين

ودمتم في رعاية الله,,