أخر الليل يـوم مريـح البـال نـام=سهرتنـي هجوسـي تنظـم ابياتهـا
انشبت في صميم القلب روس السهام=واظهرت من صميم الروح وناتهـا
آه ماهي بونة مشتكـي مـن غـرام=آه مـن صفقـة الدنيـا وميلاتـهـا
آه وان ضاعت الونه بوسط الزحـام=من درى عن وجع روحي وعلاتهـا
راح من عمري اكثر من ثلاثين عام=وتو نفسي تراجـع فـي حساباتهـا
الخساير خذت ربح السنيـن القـدام=وصرت لاقايـلاً خذهـا ولا هاتهـا
وقفت بي الذلول وطاح مني الخطام=والنجوم اختفـت عنـي علاماتهـا
كنت فارس وضيعت الرسن واللجام=ويش بقي فات نفسي كل شيء فاتها
قمت اخفي السراير واظهر الابتسام=واتحمـل مـن الايــام لوعاتـهـا
واحتري الليل لين يدسني في الظلام=وانثر دموع كـم دسيـت عبراتهـا
ثم جاني المدد من شيخ عالي مقـام=من رجال الوفى والطيـب عاداتهـا
شيخ ماياصف افعاله كثيـر الكـلام=والقصايـد بمدحـه تعجـز ابياتهـا
ابو عليان من هو له سنـد مايضـام=ذيـب يمنـاه ماتبـخـل بمداتـهـا
افتخر به ولد عمـي لبـوه الرحـام=والنشـامـا نميـزهـا بميزاتـهـا
وبعد يالهاجس اللي تالي الليل حـام=في دروب الحيـاه وفـي متاهاتهـا
السهـر كـان خليتـه لربـي قيـام=يكفـي النفـس غفلتهـا وزلاتـهـا